pdki - arm - web

ژمارە حیسابی کۆمیتەی حدکا – بلژیک
Hejmar hesaba bankî ya PDKI Belgium

PDKI Belgium Bank Account Number

 

BE61738028963717

 BIC: KREDBEBB

kurdistanmedia-com

lawan-org

jinan-co

khwendkar-com

پوخته‌یه‌ک له‌ ژیانی پڕبه‌رهه‌می پێشه‌وا قازی محه‌ممه‌د

1003قازی محه‌ممه‌د کوڕی قازی عه‌لی و کوڕه‌زای میرزا قاسمی قازی، له‌ بانه‌مه‌ڕی ساڵی 1279ی هه‌تاوی، به‌رانبه‌ر به‌ ساڵی 1900ی زایینی، له‌ شاری مه‌هاباد، له‌ بنه‌ماڵه‌یه‌کی نیشتمانپه‌روه‌ر و به‌فه‌رهه‌نگ، چاوی به‌ ژیان هه‌ڵێنا‌.

 

قازی محه‌ممه‌د له‌ ته‌مه‌نی 7 ساڵیدا ده‌نێردرێته‌ به‌ر خوێندن و پاش خوێندنی زمانی فارسی، له‌گه‌ڵ زانسته‌ جۆراوجۆره‌کانی ئایین، فه‌لسه‌فه‌، وێژه‌ و عه‌ره‌بی، له‌به‌ر ده‌ستی مامۆستایان و زانستڤانانی گه‌وره‌ی شاری مه‌هاباد، ئاشنا ده‌بێت و پله‌کانی گه‌شه‌ و پێشڤه‌چوون به‌ خێرایی ده‌بڕێت. قازی هێشا لاوێکی تازه‌ پێگه‌یشتوو بوو که‌ شاره‌زایی ته‌واوی له‌ زانسته‌ باوه‌کانی سه‌رده‌می خۆیدا هه‌بوو.


قازی له‌سه‌رده‌می لاویدا تامه‌زرۆی خوێندن و فێر بوونی زانسته‌ جۆراوجۆره‌کان ده‌بێت و هه‌ر بۆیه‌‌ له‌لای کۆمه‌ڵێک مه‌سیحی که‌ له‌ مه‌هاباد به‌ مه‌به‌ستی پڕوپاگه‌نده‌ی ئایینی ئیسلام جێگیر ببوون، فێری زۆربه‌ی زمانه‌ بیانییه‌کان بوو و وێڕای بانگه‌شه‌ی بیری رزگاریخوازی، نه‌ته‌وه‌ په‌رستی و ئازادیخوازی له‌ نێوان چینی و توێژه‌کاندا، کاروباری کۆمه‌ڵایه‌تی و مرۆیی خۆشی به‌ دڵسۆزییه‌وه‌ به‌ڕێوه‌ ده‌برد و یه‌که‌م قوتابخانه‌ و یه‌که‌م نه‌خۆشخانه‌ و یه‌که‌م دامه‌زراوه‌ له‌سه‌ر ده‌ستیدا دامه‌زرا.

348.jpg

قوتابخانه‌ی ساوایانی گه‌لاوێژ


پێشه‌وا قازی محه‌ممه‌د له‌ پاش کۆچی دوایی باوکی ده‌بێته‌ قازیی شاری مه‌هاباد و له‌ کاره‌کانیدا زیاتر گرینگیی به‌ کاروباری خوێندن و فێرکردن و هاندانی خه‌ڵک بۆ لای زانست داوه‌ و دواتر له‌ ساڵی 1941 ده‌بێته‌ به‌رپرسی ئیداره‌ی فه‌رهه‌نگ و ئه‌وقافی شاری مه‌هاباد و هه‌ر له‌ ماوه‌ی به‌رپرسایه‌تییدا یه‌که‌م قوتابخانه‌ بۆ کچان داده‌مه‌زرێنێت.

343.jpg

قوتابخانه‌یه‌کی سه‌رده‌می کۆمار

پێشه‌وا قازی به‌ ناوی نهێنیی "بینایی" ده‌بێته‌ ئه‌ندامی کۆمه‌ڵه‌ی "ژ. ک" و پاشان هه‌ر به‌ پێشنیاری پێشه‌وا، حیزبی دێموکراتی کوردستانی ئێران له‌سه‌ر بنه‌ما ته‌شکیلاتییه‌کانی ئه‌و کۆمه‌ڵه‌یه‌ له‌ رێکه‌وتی 25ی گه‌لاوێژی 1324ی هه‌تاوی له‌لایه‌ن پێشه‌وا قازی محه‌ممه‌ده‌وه‌ داده‌مه‌زرێت و له‌ یه‌که‌م کۆنگره‌ی حیزب، به‌رنامه‌ی پێشنیار کراوی قازی په‌سند ده‌بێ و خۆیشی‌ وه‌ک رێبه‌ری حیزب هه‌ڵده‌بژێردرێ. پاش ماوه‌یه‌کی کورت (5 مانگ و 7 رۆژ) له‌ رێکه‌وتی 2ی رێبه‌ندانی هه‌مان ساڵ، یه‌که‌م کۆماری دێمۆکراتیکی کوردستان له‌سه‌ر ده‌ستی پێشه‌وای کورد ــ قازی محه‌ممه‌د ــ له‌ مه‌یدانی چوارچرای مه‌هاباد به‌ هه‌ڵکردنی ئاڵای کوردستان راگه‌یاندرا و قازی محه‌ممه‌د، رێبه‌ری حیزبی دێموکراتی کوردستانی ئێران، ده‌بێت به‌ سه‌رکۆمار.

354.jpg

راگه‌یاندنی کۆماری کوردستان له‌لایه‌ن پێشه‌وا قازی محه‌ممه‌د

پێشه‌وا قازی محه‌ممه‌د پاش دامه‌زراندنی حیزبی دێموکراتی کوردستانی ئێران، له‌ خه‌رمانانی 1324ی هه‌تاویدا، سه‌ردانی شاری ته‌ورێزی کردووه‌ و له‌ جێژنی پێکهاتنی فیرقه‌ی دێمۆکراتی ئازه‌ربایجاندا به‌شداریی کردووه‌. دواتر قازی محه‌ممه‌د به‌ بانگهێشتێکی فه‌رمی وه‌ک سه‌رۆکی حدک ئێران بۆ جاری دووهه‌م، له‌گه‌ڵ هه‌یئه‌تێکی رێبه‌رایه‌تیی حیزب بۆ کاری سیاسی سه‌ردانی باکۆ ده‌کات و داوا له‌ لێپرسراوانی یه‌کیه‌تیی سۆڤییه‌ت ده‌کات پاڵپشتیی کۆماری کوردستان و گه‌لی کورد بکه‌ن.

345.jpg

دیداری پێشه‌وا و پیشه‌وه‌ری له‌ ته‌ورێز

پێشه‌وا قازی محه‌ممه‌د له‌ سه‌رده‌می ده‌سه‌ڵاتی حیزبی دێمۆکرات له‌ کۆماری کوردستاندا گرینگیی زۆری به‌ توێژه‌ جۆراوجۆره‌کانی کۆمه‌ڵگای ژیر ده‌سه‌ڵاتی کۆمار داوه‌. بۆ نموونه‌، پێشه‌وا ژن و کچی خۆی له‌مه‌ڕ راکێشانی توێژی ژنان بۆ نێو گۆڕپانی خه‌بات و کاری سیاسی و کۆمه‌ڵایه‌تی هان داوه‌.

341.jpg

مینای قازی هاوسه‌ری پێشه‌وا


پێشه‌وا قازی محه‌ممه‌د پاش ئه‌وه‌ی که‌ هه‌ست به‌ مه‌ترسیی هێرشی رێژیمی ناوه‌ندی بۆسه‌ر تاران ده‌کات، له‌ رێکه‌وتی 14ی سه‌رماوه‌زی 1325ی هه‌تاوی شوورای شه‌ڕ به‌ به‌شداریی 10 که‌س و به‌ سه‌رۆکایه‌تیی خۆی پێک ده‌هێنێت. به‌ڵام پێشه‌وا به‌ هۆی ئاشبه‌تاڵی هێندێ له‌ سه‌رۆک عه‌شیره‌ته‌کانی کوردستان (زۆربه‌ی هێزی پێشمه‌رگه‌ له‌ ژێر ده‌سه‌ڵاتی عه‌شیره‌ته‌کاندا بوو) و چاوه‌ڕوان نه‌کردن له‌ پشتیوانیی سۆڤییه‌ت و بێ‌هیوایی له‌ هێزه‌ دێمۆکراتیکه‌کانی ئێران و هه‌روه‌ها ئاڵۆز بوونی بارودۆخی نێوخۆیی کۆماری کوردستان، بـڕیاری به‌ربه‌ره‌کانێ نه‌کردن له‌گه‌ڵ ده‌وڵه‌تی مه‌رکه‌زی له‌لایه‌ن پێشه‌وا قازی‌یه‌وه‌ درا.


350.jpg

هێزی پێشمه‌رگه‌ی کۆماری کوردستان

به‌هاتنی ئه‌رتشی شا بۆ کوردستانی ژێر ده‌سه‌ڵای کۆماری کوردستان له‌ رێکه‌وتی 26ی سه‌رماوه‌زی 1325ی هه‌تاوی، کۆتایی به‌ ته‌مه‌نی پڕ به‌رهه‌می کۆماری دێمۆکراتیکی کوردستان هات و پاش چه‌ند رۆژ له‌ کۆبوونه‌وه‌ی رێبه‌رانی حیزبی دێموکرات و کۆماری کوردستان له‌گه‌ڵ سه‌رتیپ هومایوونی له‌ شاره‌داریی شاری مه‌هاباد 28 که‌س ــ له‌سه‌رووی هه‌موویانه‌وه‌ ــ پێشه‌وا قازی محه‌ممه‌د ده‌سبه‌سه‌ر کران.

دادگایی کردنی پێشه‌وا قازی و هاوڕێیانی له‌ به‌فرانباری 1325ی هه‌تاوی به‌شێوه‌ی نهێنی ده‌ستی پێکرد. پێشه‌وا قازی له‌ دادگا فه‌رمایشییه‌کانی رێژیمی شادا به‌ وره‌وه‌‌ و زۆر ئازایانه‌ به‌رگریی له‌ خۆی و کۆماری کوردستان و هه‌روه‌ها مافی نه‌ته‌وایه‌تیی گه‌له‌که‌ی کرد و کاربه‌ده‌ستان نیزامیی دادگا هه‌وڵی زۆریان دا که‌ قازی محه‌ممه‌د بێننه‌ سه‌ر ئه‌و بـڕوایه‌ که‌ په‌شیمانی خۆی رابگه‌یه‌نێت. به‌ڵام پێشه‌وا قازی ئازایانه‌ دادگا فه‌رمایشییه‌کان به‌ چۆکدا هێنا.

344.jpg

رێکه‌وتی 3ی رێبه‌ندانی 1325ی هه‌تاوی، پێشه‌وا قازی و هاوڕێیانی له‌ به‌ناو دادگاکانی رێژیمی شاهه‌نشاهیدا مه‌حکووم به‌ سێداره‌ کران و له‌ به‌ره‌به‌یانی 10ی خاکه‌لێوه‌ی 1326ی هه‌تاوی، له‌ مه‌یدانی چوارچرای مه‌هاباد، ئه‌و شوێنه‌ی که‌ کۆماری تێدا راگه‌یه‌ندرابوو، شه‌هید کرا

ڕۆژمێری کوردستان

4444

ژیاننامەی ڕێبه‌ران

peshawa-qazimohamad

shahid-dr-qasimlu

sadiq-sharafkandi